حوثی چینی پرزوں کی مدد سے جدید بیلسٹک میزائل بنا رہے ہیں: امریکی اخبار کا انکشاف

یمن کے حوثی جنگجوؤں کی جانب سے چین سے درآمد کردہ پرزوں اور آلات کی مدد سے جدید درمیانے فاصلے تک مار کرنے والے بیلسٹک میزائل تیار کرنے کی کوششوں کا انکشاف ہوا ہے۔

امریکی اخبار ‘وال اسٹریٹ جرنل’ کی رپورٹ کے مطابق تنازعات والے خطوں میں ہتھیاروں کی سپلائی چین پر تحقیق کرنے والے معروف ادارے ‘کنفلکٹ آرمامنٹ ریسرچ’ (Conflict Armament Research) نے انکشاف کیا ہے کہ حوثیوں نے ایک چینی سپلائر کے ذریعے ایرانی میزائل ‘خیبر شکن’ کا مقامی ورژن تیار کرنے کے لیے ضروری پرزے منگوائے ہیں۔ رپورٹ کے مطابق اس مجوزہ بیلسٹک میزائل کی مار کرنے کی صلاحیت تقریباً 1,200 میل (2,000 کلومیٹر) ہو گی، جس کی زد میں پورا سعودی عرب اور اسرائیل آ سکتے ہیں۔ خیبر شکن کو اس کی سیکیورٹی و دفاعی نظام کو چکمہ دے کر ہدف کو نشانہ بنانے کی صلاحیت کے باعث انتہائی مہلک سمجھا جاتا ہے۔

یہ انکشاف یمنی حکام کی جانب سے تحویل میں لی گئی دو مشکوک شپمنٹس کی تحویل اور جانچ کے بعد سامنے آیا ہے، جن میں صنعتی سامان کی آر میں میزائل سازی کے حساس آلات چھپائے گئے تھے۔ ادارے کے سینئر تجزیہ کار فیبین ہنز (Fabien Hinz) کے مطابق ان پرزوں کی وصولی سے واضح ہوتا ہے کہ حوثی خطے میں اپنی ہتھیار سازی کی صلاحیتوں کو تیزی سے آگے بڑھا رہے ہیں۔ واضح رہے کہ حالیہ دنوں میں حوثیوں کی جانب سے سعودی عرب پر حملوں اور آبنائے ہرمز میں کشیدگی کے باعث عالمی مارکیٹ میں خام تیل کی قیمتوں میں اضافہ ہوا ہے، جس پر امریکی صدر ڈونلڈ ٹرمپ نے بھی شدید برہمی کا اظہار کیا ہے۔