لبنانی صدر اور ایرانی وزیر خارجہ کا رابطہ، سفارت کاری پر زور

لبنان کے صدر جوزف عون اور ایرانی وزیرِ خارجہ عباس عراقچی کے درمیان ایک اہم ٹیلی فونک رابطہ ہوا ہے، جس میں مشرقِ وسطیٰ کی مجموعی سیکیورٹی صورتحال، بڑھتی ہوئی عسکری کشیدگی اور تنازعات کے پرامن حل کے لیے سفارتی کوششوں پر تفصیلی تبادلہ خیال کیا گیا۔

لبنانی صدارتی دفتر کی جانب سے جاری کردہ اعلامیے کے مطابق دونوں رہنماؤں نے اس بات پر مکمل اتفاق کیا کہ خطے میں پائیدار امن کے قیام اور جنگ کے اثرات کو پھیلنے سے روکنے کے لیے سفارت کاری اور سیاسی مذاکرات ہی واحد اور بہترین راستہ ہیں۔ گفتگو کے دوران علاقائی استحکام کی بحالی اور جاری سیکیورٹی چیلنجز سے نمٹنے کے لیے فوری سفارتی اقدامات کی ضرورت پر زور دیا گیا۔

واضح رہے کہ لبنانی صدر اور ایرانی وزیرِ خارجہ کے درمیان اس اہم رابطہ سے ٹھیک قبل ایران کے نائب وزیرِ خارجہ سعید خطیب زادہ اہم سفارتی مشن پر بیروت پہنچے تھے، جس کے بعد دونوں ممالک کے درمیان خطے میں جاری کشیدگی کو کم کرنے کے لیے اعلیٰ سطح کے رابطوں میں مزید تیزی آئی ہے۔