حضرت عیسٰیؑ کے زمانے سے بھی تقریبا 1000 سال پہلے کا درخت جو آج بھی پھل دے رہا ہے

یونان کے جزیرے کریٹ کے گاؤں اینو ووز میں واقع ’Olive Tree of Vouves‘ کو دنیا کا قدیم ترین زیتون کا درخت قرار دیا گیا ہے۔

اس درخت کی عمر تقریباً 3000 سال ہے، جبکہ بعض ماہرین اسے 4000 سال تک بھی بتاتے ہیں، یعنی حضرت عیسٰیؑ کے زمانے سے ہزاروں سال پہلے سے موجود ہے۔ حیرت انگیز بات یہ ہے کہ یہ قدیم درخت آج بھی زیتون دیتا ہے۔

درخت کا تنا بہت بڑا اور گھنا ہے جس کا محیط تقریباً 12.5 میٹر (41 فٹ) اور قطر قریب 4.6 میٹر ہے۔ 1997 میں اسے قدرتی یادگار کا درجہ دیا گیا اور قریب ہی زیتون میوزیم قائم کیا گیا۔

یہ درخت نہ صرف اپنی قدیم عمر کی وجہ سے مشہور ہے بلکہ اس کی شاخیں تاریخی مواقع، جیسے اولمپکس کی رسومات میں بھی استعمال ہوتی رہی ہیں۔