ٹرمپ نے ایران سے تجارت کرنے والے ممالک پر 25 فیصد ٹیرف عائد کرنے کا اعلان کر دیا

واشنگٹن: امریکی صدر ڈونلڈ ٹرمپ نے ایران سے تجارت کرنے والے ممالک پر 25 فیصد ٹیرف عائد کرنے کا اعلان کر دیا ہے۔

صدر ٹرمپ نے سوشل میڈیا پر جاری بیان میں خبردار کیا کہ یہ حکم حتمی ہے اور فوری طور پر نافذ العمل ہوگا۔ ان کے مطابق جو بھی ملک ایران کے ساتھ تجارت کرے گا، اسے امریکا کے ساتھ تمام تجارتی لین دین پر 25 فیصد ٹیرف ادا کرنا ہوگا۔

رپورٹس کے مطابق یہ حکم ایران میں جاری حکومت مخالف مظاہروں اور مظاہرین کے خلاف کریک ڈاؤن کے تناظر میں سامنے آیا ہے۔ امریکی انسانی حقوق تنظیم کے دعوے کے مطابق گزشتہ دو ہفتوں میں ایران میں 490 افراد ہلاک ہو چکے ہیں۔ صدر ٹرمپ نے مظاہرین کی ہلاکت پر ایرانی حکومت کو پہلے بھی سخت وارننگ دی تھی اور کہا تھا کہ ایران کے خلاف مختلف آپشنز پر غور کیا جا رہا ہے، جس میں فوجی کارروائی بھی شامل ہے۔