محمد صالح نے تاریخی سنگِ میل عبور کر کے رونالڈو اور میسی کو پیچھے چھوڑ دیا

مصر سے تعلق رکھنے والے فٹبال اسٹار محمد صالح نے ایک شاندار بین الاقوامی اعزاز اپنے نام کیا، جس میں انہوں نے لیجنڈز لیونل میسی اور کرسٹیانو رونالڈو کو بھی پیچھے چھوڑ دیا۔

غیر ملکی میڈیا رپورٹس کے مطابق صالح نے یہ سنگِ میل میسی اور رونالڈو کی نسبت کم میچز میں حاصل کیا۔ اس وقت صالح افریقہ کپ آف نیشنز میں مصر کی نمائندگی کر رہے ہیں اور ٹیم کو سیمی فائنل تک پہنچانے میں اہم کردار ادا کیا۔

آئیوری کوسٹ کے خلاف کوارٹر فائنل میں اہم گول کرنے کے بعد محمد صالح کے مجموعی گول اور اسسٹ کی تعداد 100 ہو گئی۔ صالح نے گزشتہ 15 برسوں میں مصر کی قومی ٹیم کے 111 میچز میں 65 گول اسکور کیے اور 35 اسسٹ فراہم کیے۔

میسی نے ارجنٹینا کے لیے یہ سنگِ میل 122 میچز میں حاصل کیا جبکہ رونالڈو نے پرتگال کے لیے 136 میچز میں مکمل کیا۔ سب سے تیزی سے یہ ہدف برازیلین لیجنڈ پیلے نے 77 میچز میں حاصل کیا، جبکہ نیمار نے 94 میچز میں یہ کارنامہ سرانجام دیا۔