گزشتہ سال ساڑھے سات لاکھ سے زائد پاکستانی روزگار کے لیے بیرونِ ملک گئے، سرکاری رپورٹ جاری

بیورو آف امیگریشن کے جاری کردہ اعداد و شمار کے مطابق گزشتہ سال بیرونِ ملک جانے والے پاکستانیوں کی تعداد میں نمایاں اضافہ ریکارڈ کیا گیا۔ رپورٹ کے مطابق 2024 میں 7 لاکھ 27 ہزار 381 پاکستانی ملازمت کے لیے بیرونِ ملک گئے جبکہ مجموعی تعداد ساڑھے سات لاکھ سے تجاوز کر گئی۔

دستاویز کے مطابق 2025 میں 4 لاکھ سے زائد غیر ہنرمند اور 2 لاکھ سے زائد ہنرمند پاکستانیوں کو بیرونِ ملک روزگار ملا۔ سب سے زیادہ پاکستانی سعودی عرب گئے۔

اعداد و شمار کے مطابق گزشتہ سال 5 ہزار 659 اکاؤنٹنٹ، 10 ہزار 503 باورچی، 3 ہزار 795 ڈاکٹر، 5 ہزار 946 انجینیئر اور 1 ہزار 640 نرسز بیرونِ ملک ملازمت کے لیے گئے۔ اسی طرح 1 ہزار 725 اساتذہ، ایک لاکھ 63 ہزار 718 ڈرائیور، 6 ہزار 475 الیکٹریشنز اور 4 لاکھ 65 ہزار 138 مزدور بھی روزگار کی تلاش میں ملک سے باہر گئے۔

رپورٹ میں بتایا گیا ہے کہ 5 ہزار 700 مستری، 12 ہزار 703 ٹیکنیشنز، 11 ہزار 777 منیجرز اور 2 ہزار 306 پلمبر بھی بیرونِ ملک گئے۔ گزشتہ سال کے دوران 2 لاکھ 22 ہزار 171 ہنرمند، 42 ہزار 257 نیم ہنرمند اور 4 لاکھ 66 ہزار 62 غیر ہنرمند پاکستانی بیرونِ ملک گئے۔

ملک وار تفصیل کے مطابق 5 لاکھ 30 ہزار 256 پاکستانی سعودی عرب گئے، 52 ہزار 664 متحدہ عرب امارات، 68 ہزار 376 قطر، 37 ہزار 726 بحرین، 6 ہزار 590 کویت اور 1 ہزار 5 افراد امریکا گئے۔

اسی طرح 4 ہزار 355 پاکستانی برطانیہ، 984 جرمنی، 813 اٹلی، 2 ہزار 230 چین، 2 ہزار 210 جاپان اور 1 ہزار 109 رومانیا گئے جبکہ 39 افراد جنوبی کوریا گئے۔