گجرات میں جنگلی بندروں سے اُدھم مچا دیا، محکمہ لائیوسٹاک پکڑنے میں ناکام

پنجاب کے شہر گجرات میں جنگلی بندر آبادی میں داخل ہو گئے ہیں جس کے باعث شہریوں میں شدید خوف و ہراس پھیل گیا ہے۔ علاقہ مکینوں کے مطابق چوک ماہنہ، چاہ پیپل والا کھو، فوارہ چوک، کھاری کھوئی، قلعہ ڈھکی سمیت دیگر علاقوں میں بندر عمارتوں کی چھتیں پھلانگتے اور بجلی کی تاروں پر جھولتے نظر آتے ہیں، جن کی فوٹیجز بھی سامنے آ چکی ہیں۔

اہلِ علاقہ کا کہنا ہے کہ بندر انتہائی شرارتی ہو چکے ہیں، گھروں کی چھتوں سے سامان اٹھا کر بھاگ جاتے ہیں جبکہ کئی بچے بھی بندروں کے حملوں کا نشانہ بن چکے ہیں۔

شہریوں نے بتایا کہ ایک ہفتے سے زائد کا وقت گزرنے کے باوجود محکمہ وائلڈ لائف بندروں کو قابو میں کرنے میں ناکام رہا ہے۔ عوام نے انتظامیہ سے مطالبہ کیا ہے کہ فوری طور پر بندروں کو پکڑنے کا مؤثر انتظام کیا جائے، بصورتِ دیگر کسی بڑے حادثے کا خدشہ ہے۔