نیوزی لینڈ کے ساحل پر پھنس کر 6 وہیل مچھلیاں ہلاک

نیوزی لینڈ کے جنوبی جزیرے کے ایک دور دراز ساحل پر وہیل مچھلیوں کے پھنسنے کا افسوسناک واقعہ پیش آیا، جس کے نتیجے میں 6 وہیل مچھلیاں ہلاک ہو گئیں۔

برطانوی خبر رساں ادارے بی بی سی کے مطابق ساحل پر تقریباً 55 پائلٹ وہیل مچھلیاں پھنسی ہوئی تھیں، جن میں سے بیشتر کو واپس سمندر میں بھیجنے میں کامیابی حاصل کر لی گئی۔ تاہم 15 وہیل مچھلیاں بری طرح ساحل پر پھنس گئیں، جن میں سے 6 جانبر نہ ہو سکیں۔

میڈیا رپورٹس کے مطابق پھنسی ہوئی وہیل مچھلیاں ساحل کے قریب تقریباً ایک کلو میٹر کے علاقے میں پھیلی ہوئی تھیں۔ باقی ماندہ مچھلیوں کو بچانے کے لیے غیر سرکاری تنظیم پروجیکٹ جونا کی جانب سے ریسکیو آپریشن جاری ہے۔

واضح رہے کہ نیوزی لینڈ کے ساحلی علاقوں میں اس سے قبل بھی وہیل مچھلیوں کے ساحل پر پھنسنے کے واقعات پیش آتے رہے ہیں، جن میں متعدد مچھلیاں ہلاک ہو چکی ہیں۔