10 بیٹیوں کے بعد بیٹے کی پیدائش، والد کا دقیانوسی روایات ماننے سے انکار سوشل میڈیا پر ویڈیو نے خاص

بھارتی ریاست ہریانہ میں ایک 37 سالہ خاتون نے دس بیٹیوں کے بعد بیٹے کو جنم دیا ہے، جس نے ایک بار پھر ماں کی صحت کو لاحق خطرات اور معاشرے میں بیٹے کی ترجیح سے جڑی سوچ پر بحث چھیڑ دی ہے۔

اوچانا کے میٹرنٹی ہوم میں ہونے والی یہ ولادت طبی لحاظ سے ہائی رسک قرار دی گئی تھی۔ زچگی کے دوران خاتون کو تین یونٹ خون کی ضرورت پڑی، تاہم ڈاکٹروں کے مطابق بروقت طبی امداد کے باعث ماں اور نومولود دونوں کی حالت اب تسلی بخش ہے۔

بچے کے والد 38 سالہ سنجے کمار کے مطابق ان کی شادی کو 19 سال ہو چکے ہیں اور انہیں اور ان کی بڑی بیٹیوں کو بیٹے کی خواہش تھی۔ سنجے کمار نے کہا کہ محدود آمدنی کے باوجود وہ اپنی تمام بیٹیوں کی تعلیم جاری رکھے ہوئے ہیں اور وہ اپنے خاندان سے مطمئن اور خوش ہیں۔

خاندان نے بیٹے کا نام دل خوش رکھا ہے جس کا مطلب ’’خوش دل‘‘ ہے۔ خاندان کی سب سے بڑی بیٹی سارہ بارہویں جماعت میں زیر تعلیم ہے جبکہ امریتا، سوشیلا، کرن، دیویا، مننت، کرتیکا، امنیش، لکشمی اور ویشالی مختلف جماعتوں میں تعلیم حاصل کر رہی ہیں۔

یہ واقعہ سوشل میڈیا پر اس وقت وائرل ہو گیا جب ایک ویڈیو میں والد کو اپنی دس بیٹیوں کے نام یاد کرنے میں مشکل پیش آتی دکھائی دی۔ ویڈیو پر صارفین نے ملا جلا ردعمل دیا، کچھ نے اسے خوشی کا موقع قرار دیا جبکہ کئی افراد نے ماں کی صحت اور مسلسل حمل کے خطرات پر سوالات اٹھائے۔

سنجے کمار نے واضح کیا کہ وہ روایتی سماجی دباؤ یا بیٹوں کی برتری کی سوچ کے حامی نہیں اور ان کے نزدیک لڑکیاں بھی ہر میدان میں کامیاب ہو سکتی ہیں۔

یہ واقعہ ہریانہ میں صنفی تناسب کے مسئلے کو بھی ایک بار پھر نمایاں کرتا ہے۔ اعداد و شمار کے مطابق 2025 میں ریاست میں ہر ایک ہزار مردوں کے مقابلے میں خواتین کی تعداد 923 ہے، جو قومی اوسط سے کم ہے۔ ماہرین کے مطابق ایسے واقعات سماجی رویوں اور صحت سے متعلق پالیسیوں پر سنجیدہ غور و فکر کی ضرورت کو اجاگر کرتے ہیں۔