چین: والدین کا بچوں کو شادی کیلئے راضی کرنے کا انوکھا طریقہ

چین میں شادیوں کی شرح میں نمایاں کمی کے بعد والدین اپنے بچوں کو شادی پر آمادہ کرنے کے لیے مصنوعی ذہانت (اے آئی) سے تیار کردہ ویڈیوز کا استعمال کرنے لگے ہیں۔

چینی وزارت کے مطابق سال 2024 میں ملک بھر میں 61 لاکھ 6 ہزار شادیوں کی رجسٹریشن ہوئی، جو گزشتہ سال کے مقابلے میں تقریباً 20 فیصد کم ہے۔ اس صورتحال نے بالخصوص والدین کو شدید تشویش میں مبتلا کر دیا ہے، جو اس مسئلے سے نمٹنے کے لیے مختلف طریقے آزما رہے ہیں۔

میڈیا رپورٹس کے مطابق ڈویِن (ٹک ٹاک کا چینی ورژن) اور ویئبو جیسے مقبول سوشل میڈیا پلیٹ فارمز پر اے آئی سے بنائی گئی ویڈیوز کی بھرمار ہے۔ ان ویڈیوز میں بزرگ افراد کو دکھایا جاتا ہے جو اس بات پر پچھتاوا کر رہے ہوتے ہیں کہ انہوں نے جوانی میں اپنے والدین کی بات نہ مانتے ہوئے شادی نہیں کی۔

ایک وائرل ویڈیو میں اے آئی سے تیار کردہ 58 سالہ خاتون کو ہسپتال میں اکیلے بیٹھے دکھایا گیا ہے، جبکہ اردگرد موجود دیگر مریضوں کی دیکھ بھال ان کے اہلِ خانہ کر رہے ہیں۔ ایک اور کلپ میں 56 سالہ خاتون اس بات پر افسوس کا اظہار کرتی نظر آتی ہیں کہ انہوں نے اپنے والدین کے شادی سے متعلق مشورے کو نظر انداز کیا۔

ماہرین کے مطابق یہ ویڈیوز جذباتی اثر ڈالنے کے لیے بنائی جا رہی ہیں تاکہ نوجوان نسل کو شادی کی اہمیت کا احساس دلایا جا سکے، تاہم اس رجحان نے سوشل میڈیا پر ایک نئی بحث کو بھی جنم دے دیا ہے۔