بریڈ فورڈ کی مسجد میں پہلی بار معمر افراد کے لیے ورزش کا اہتمام، سب ورطہ حیرت میں گم

برطانیہ کے شہر بریڈ فورڈ کی جامع عثمانیہ مسجد میں ہر جمعرات کو 50 سال سے زائد عمر کے مردوں کے لیے مخصوص ورزش، پائلٹس (Pilates) کے سیشنز کا انعقاد کیا جاتا ہے، جس کی ویڈیو سوشل میڈیا پر غیر معمولی مقبولیت حاصل کر چکی ہے اور اب تک 20 لاکھ سے زائد بار دیکھی جا چکی ہے۔

مسجد کے سیکرٹری محمد الیاس کے مطابق یہ کلاسز بزرگ افراد کی صحت، لچک اور مجموعی فلاح و بہبود کو بہتر بنانے کے مقصد سے شروع کی گئی ہیں۔ انہوں نے بتایا کہ ویڈیو کے اس قدر وائرل ہونے پر مسجد انتظامیہ خود بھی حیران ہے۔ ٹک ٹاک پر ویڈیو کو تقریباً 20 لاکھ جبکہ فیس بک پر بھی بڑی تعداد میں ناظرین نے دیکھا ہے۔

محمد الیاس کا کہنا تھا کہ دنیا بھر سے لوگ تبصرے کر رہے ہیں اور یہ جاننا چاہتے ہیں کہ وہ اپنی مساجد میں بھی اس طرح کی سرگرمیاں کیسے شروع کر سکتے ہیں۔ انہوں نے مزید بتایا کہ مستقبل میں خواتین کے لیے بھی اسی طرز کی کلاسز متعارف کرانے کا ارادہ ہے۔

کلاسز کے انسٹرکٹر کے مطابق ان سیشنز کا مقصد مردوں کی جسمانی صحت کے ساتھ ساتھ ذہنی سکون اور روحانی توازن کو فروغ دینا ہے۔ ان کا کہنا تھا کہ نوجوان مردوں کے لیے باڈی بلڈنگ اور فٹنس کے مواقع تو ہوتے ہیں، لیکن عمر بڑھنے کے بعد ایسے مواقع محدود ہو جاتے ہیں، جبکہ یہ کلاسز بزرگ مردوں کے لیے ایک مثبت اور محفوظ سرگرمی فراہم کرتی ہیں۔

جون 2024 میں دل کے ٹرانسپلانٹ کے بعد ان کلاسز میں شامل ہونے والے عبید خان نے کہا کہ یہ سرگرمی ان کے لیے نہ صرف جسمانی بلکہ جذباتی طور پر بھی بے حد فائدہ مند ثابت ہوئی ہے۔ ان کے مطابق انہوں نے یہاں نئے لوگوں سے ملاقات کی اور دوستیاں بھی قائم ہوئیں۔

مسجد میں ہر سیشن کے بعد تمام شرکاء اکٹھے ہو کر چائے، پھل اور بسکٹ کے ساتھ وقت گزارتے ہیں، جس سے باہمی میل جول اور کمیونٹی کا جذبہ مزید مضبوط ہوتا ہے۔ نمازیوں کا کہنا ہے کہ مسجد کو صرف عبادت گاہ ہی نہیں بلکہ ایک فعال کمیونٹی ہب بنانے کی کوشش کی جا رہی ہے، جبکہ قریبی نئی عمارت میں خواتین کے لیے بھی کلاسز شروع کرنے کا منصوبہ ہے۔