یمن کا یو اے ای کے ساتھ دفاعی معاہدہ ختم کرنے کا اعلان

یمن کی صدارتی کونسل (پی ایل سی) کے سربراہ رشاد العلیمی نے متحدہ عرب امارات کے ساتھ مشترکہ دفاعی معاہدہ منسوخ کرنے کا اعلان کر دیا ہے۔ عرب میڈیا کے مطابق رشاد العلیمی نے یمن میں موجود یو اے ای کی تمام فورسز کو 24 گھنٹوں کے اندر ملک چھوڑنے کی ہدایت جاری کی ہے۔

انہوں نے مزید کہا کہ یمن کی تمام بندرگاہوں اور زمینی و بحری گزرگاہوں پر 72 گھنٹوں کے لیے مکمل فضائی، زمینی اور بحری ناکہ بندی نافذ کی جا رہی ہے۔ یہ احکامات ایسے وقت میں سامنے آئے ہیں جب سعودی قیادت میں قائم فوجی اتحاد نے یمن میں محدود فضائی کارروائی کرتے ہوئے مکلا بندرگاہ کو نشانہ بنایا۔

سعودی اتحاد کے مطابق کارروائی یو اے ای کی حمایت یافتہ جنوبی علیحدگی پسند تنظیم سدرن ٹرانزیشنل کونسل (STC) کو فراہم کی جانے والی غیر ملکی فوجی معاونت کے خلاف کی گئی۔ دوسری جانب سعودی عرب کی وزارت خارجہ نے یو اے ای کے اقدامات کو خطرناک قرار دیتے ہوئے کہا ہے کہ یہ خطے کے استحکام کے لیے سنگین خدشات پیدا کر سکتے ہیں۔