چیف الیکشن کمشنر کی میرپور ڈویژن کے عوام سے انتخابات میں بھرپور شرکت کی اپیل

چیف الیکشن کمشنر آزاد جموں و کشمیر جسٹس (ر) غلام مصطفیٰ مغل نے میرپور ڈویژن کے عوام سے 27 جولائی کو ہونے والے عام انتخابات میں بھرپور شرکت کی اپیل کی ہے۔ اپنے ایک بیان میں انہوں نے زور دیا کہ ووٹرز گھروں سے نکل کر اپنے حقِ رائے دہی کا استعمال کریں، کیونکہ ووٹ دینا ہر شہری کا قومی، آئینی اور اسلامی فریضہ ہے۔ چیف الیکشن کمشنر نے عوام کو یقین دہانی کرائی کہ تمام پولنگ اسٹیشنز پر سکیورٹی فورسز اور کوئیک رسپانس فورس کی تعیناتی سمیت تمام جامع انتظامات مکمل کر لیے گئے ہیں تاکہ شہری بلا خوف و خطر ووٹ ڈال سکیں۔ انہوں نے واضح کیا کہ ووٹنگ کے عمل میں خلل ڈالنے یا امن و امان خراب کرنے کی کوشش کرنے والے کسی بھی عنصر کے خلاف قانون کے مطابق سخت ترین کارروائی کی جائے گی۔