صدر ٹرمپ نے فی الحال ایران پر حملوں میں شدت نہ لانے کا فیصلہ کر لیا: امریکی میڈیا

امریکی میڈیا اداروں ‘نیویارک ٹائمز’، ‘ایگزیوس’، ‘سی این این’ اور ‘اے پی’ کی رپورٹس کے مطابق صدر ڈونلڈ ٹرمپ نے ایران کے خلاف جارحانہ فوجی کارروائیوں میں فی الحال شدت نہ لانے کا فیصلہ کیا ہے۔ میڈیا ذرائع کے مطابق یہ قدم دفاعی حکام کی جانب سے پیٹریاٹ میزائلوں کے محدود ہوتے ذخائر اور خلیج فارس میں عرب اتحادیوں کے دور ہونے کے خدشات کے پیشِ نظر اٹھایا گیا ہے، جس کے بعد مسلسل دو راتوں سے امریکی فضائی حملے روک دیے گئے ہیں۔ ‘نیویارک ٹائمز’ نے بتایا کہ جنرل ڈین کین اور نائب صدر جے ڈی وینس نے ٹرمپ کو فضائی دفاعی صلاحیتیں متاثر ہونے اور جنگ کے طویل اثرات سے خبردار کیا تھا۔ وائٹ ہاؤس نے ان رپورٹس پر بظاہر موقف دیا ہے کہ صدر ٹرمپ ہمیشہ سفارت کاری کو ترجیح دیتے ہیں، جبکہ دوسری جانب عمان کا ایک اعلیٰ سطح کا وفد بھی آبنائے ہرمز کی صورتحال پر تہران کے ساتھ معاہدے کی پیشرفت کے لیے تہران میں موجود ہے۔