یوکرین نے بحیرہ کیسپیئن میں ایرانی تجارتی جہاز پر حملہ کر دیا

ایران کی وزارتِ خارجہ نے بحیرۂ کیسپین (دریائے خزر) میں اپنے ایک تجارتی جہاز پر یوکرینی حملے کی شدید الفاظ میں مذمت کی ہے، جس کے نتیجے میں ایک ملاح ہلاک اور ایک زخمی ہو گیا۔ تہران نے اس حملے کو “جارحیت کا اقدام” اور جنگ کا دائرہ وسیع کرنے کی کوشش قرار دیتے ہوئے تہران میں یوکرین کے ناظم الامور کو طلب کر کے باضابطہ احتجاج ریکارڈ کرایا ہے۔ ایران کا کہنا ہے کہ وہ اپنے قومی مفادات اور بحری سلامتی کا ہر قیمت پر دفاع کرے گا۔ دوسری جانب یوکرینی صدر وولودیمیر زیلنسکی نے دعویٰ کیا ہے کہ روس مشرقِ وسطیٰ میں حملوں کی رہنمائی کے لیے ایران کو اپنے سیٹلائٹ سکیورٹی ڈیٹا کی رسائی فراہم کر رہا ہے، جبکہ یوکرین اس سے قبل خطے کے دیگر ممالک کو ایرانی ڈرونز کو ناکام بنانے کے لیے تکنیکی مہارت کی پیشکش بھی کر چکا ہے۔