محسن نقوی کا تربت میں ایف سی کے جدید ترین ہسپتال کا افتتاح

وفاقی وزیر داخلہ محسن نقوی نے تربت میں فرنٹیئر کور (ایف سی) بلوچستان (ساؤتھ) ہیڈ کوارٹرز کا دورہ کیا اور وہاں قائم کیے گئے جدید ترین ہسپتال کا افتتاح کیا۔ دورے کے دوران انہوں نے او پی ڈی، ایم آر آئی، سی ٹی سکین رومز اور آپریشن تھیٹرز کا معائنہ کیا اور طبی عملے کو دکھی انسانیت کی خدمت کی ہدایت کی۔ انہوں نے ہسپتال کی ریکارڈ مدت میں تکمیل پر آئی جی ایف سی بلوچستان (ساؤتھ) میجر جنرل بلال سرفراز خان اور ان کی ٹیم کو سراہتے ہوئے کہا کہ یہ ہسپتال نہ صرف فورس بلکہ تربت کی مقامی آبادی کو بھی علاج معالجے کی بہترین سہولیات فراہم کرے گا۔ اس موقع پر وزیر داخلہ کو پیشہ ورانہ امور، فیلڈ آپریشنز اور طبی سہولیات پر بریفنگ دی گئی، جبکہ محسن نقوی نے تمام کالعدم دہشت گرد گروہوں کے خلاف کامیاب آپریشنز پر ایف سی بلوچستان کی کارکردگی کو زبردست خراجِ تحسین پیش کیا۔