روس کے جوہری دفاع نظام کا بحری حصہ مزید طاقتور بن رہا ہے: پوتن

روسی صدر ولادیمیر پوتن نے یومِ بحریہ کے موقع پر اپنے تہنیتی پیغام میں اعلان کیا ہے کہ روسی بحریہ مسلسل ترقی کی راہ پر گامزن ہے اور ملک کے ایٹمی دفاعی نظام (نیوکلیئر ٹرائیڈ) کے بحری حصے کو مزید طاقتور بنایا جا رہا ہے۔ انہوں نے بتایا کہ آبدوزوں، سطحی جنگی جہازوں، ساحلی دفاعی یونٹس اور نیول ایوی ایشن کو جدید ترین ہتھیاروں اور سازوسامان سے لیس کیا جا رہا ہے جبکہ نئے جنگی جہازوں کی سیریل بنیادوں پر تیاری بھی جاری ہے۔ صدر پوتن کا کہنا تھا کہ 13 سمندروں سے جڑی سرحدوں کے باعث بحریہ قومی دفاع اور سمندری مفادات کے تحفظ میں بنیادی کردار ادا کرتی ہے، اور روسی بحری اہلکار ہر قسم کی بدلتی ہوئی عسکری اور اسٹریٹجک صورتحال کا مقابلہ کرنے کی مکمل صلاحیت رکھتے ہیں۔