یمن میں حوثیوں کا حملہ، 14 سرکاری فوجی اہلکار جاں بحق

یمن میں ایران کے حمایت یافتہ حوثی باغیوں اور بین الاقوامی سطح پر تسلیم شدہ سرکاری افواج کے درمیان ایک بار پھر خونریز جھڑپیں ہوئی ہیں، جس کے نتیجے میں کم از کم 14 سرکاری فوجی اہلکار جاں بحق ہو گئے۔

بین الاقوامی خبر رساں ادارے ‘اے ایف پی’ کے مطابق یہ دراندازی یمن کے مغربی ساحلی صوبے الحدیدہ کے جنوب میں واقع ضلع حیس میں پیش آئی، جہاں حوثی جنگجوؤں نے سرکاری فوج کی اگلی پوزیشنوں کو نشانہ بناتے ہوئے اچانک حملہ کیا۔

یمنی حکومت سے وابستہ ایک فوجی عہدیدار نے میڈیا کو بتایا کہ سرکاری فورسز نے حوثیوں کے اس حملے کا بھرپور جواب دیا، جس کے بعد دونوں اطراف سے کئی گھنٹوں تک گولہ باری کا تبادلہ ہوا اور شدید لڑائی جاری رہی۔ فوجی عہدیدار کے مطابق، فورسز نے بہادری سے لڑتے ہوئے حوثیوں کا حملہ پسپا کر دیا، تاہم اس دوران حکومت کے 14 اہلکار جان کی بازی ہار گئے۔

فوجی حکام نے دعویٰ کیا ہے کہ سرکاری فوج کی جوابی کارروائی میں حوثی جنگجوؤں کو بھی بھاری جانی نقصان اٹھانا پڑا ہے، تاہم مخالف فریق کے ہلاک یا زخمی ہونے والوں کی درست تعداد کا ابھی تعین نہیں کیا جا سکا۔ واضح رہے کہ الحدیدہ اور اس کے اطراف کے اسٹریٹجک علاقے یمن کی طویل خانہ جنگی کے دوران اہم ترین جنگی محاذ رہے ہیں، جہاں جنگ بندی کی کوششوں کے باوجود وقتاً فوقتاً ایسے تصادم رونما ہوتے رہتے ہیں