انعام بٹ کے ڈوپ ٹیسٹ مثبت آنے کی تفصیلات سامنے آگئیں

لاہور: پاکستان کے عالمی شہرت یافتہ پہلوان اور گولڈ میڈلسٹ انعام بٹ کے ڈوپ ٹیسٹ مثبت آنے کے معاملے پر اہم اور تفصیلی معلومات سامنے آئی ہیں، جس کے مطابق یہ ڈوپنگ کی دانستہ کوشش کے بجائے بینائی کی دوا کے استعمال کا نتیجہ تھا۔

ذرائع کے مطابق انعام بٹ آنکھوں کے عارضے کے علاج کے لیے ایک مخصوص دوا استعمال کر رہے تھے، تاہم ایشین بیچ گیمز کے دوران ڈوپ ٹیسٹ سے قبل انہوں نے اس میڈیکل ہسٹری کو باقاعدہ ڈکلیئر نہیں کیا تھا۔ رواں سال مئی میں نوٹس جاری ہونے کے بعد انعام بٹ نے اپنی آنکھوں کے تمام طبی معائنوں، سکین رپورٹس اور ڈاکٹرز کی تجویز کردہ ادویات کی مکمل فہرست انٹرنیشنل ٹیسٹنگ ایجنسی (ITA) کو فراہم کی، جس کا تفصیلی جائز لینے کے بعد آئی ٹی اے اور متعلقہ طبی حکام نے ان کی بیماری اور دوا کے ضرورت کو تسلیم کر لیا۔

ذرائع کا کہنا ہے کہ ٹیسٹ میں ممنوعہ مادے کی انتہائی معمولی مقدار پائی گئی جو جسمانی طاقت یا کارکردگی بڑھانے والی (Performance-Enhancing) دوا نہیں تھی بلکہ محض علاج کی غرض سے استعمال کی گئی تھی۔ اگرچہ طبی بنیادوں پر ان کے موقف کو تسلیم کر لیا گیا ہے، تاہم ٹیسٹ سے قبل دوا ظاہر نہ کرنے کی انتظامی غلطی کے باعث ان کے خلاف جزوی تادیبی کارروائی کا امکان ہے۔ انعام بٹ ’بی‘ سیمپل کی دوبارہ جانچ کے لیے نہیں جائیں گے لیکن ضرورت پڑنے پر اپنے دفاع کے لیے معامله کھیلوں کی عالمی ثالثی عدالت (CAS) میں لے جانے کا اختیار رکھتے ہیں۔