گالف کی گیندوں سے بنا دنیا کا سب سے بڑا اہرام

ٹیکساس: امریکا میں گالف کے تین دیوانوں نے اپنی منفرد لگن اور محنت کی بدولت گالف کی گیندوں سے بنا دنیا کا سب سے بڑا اہرام (Pyramid) تیار کر کے گنیز ورلڈ ریکارڈ اپنے نام کر لیا ہے۔

امریکی ریاست ٹیکساس میں مائیکل فر، ڈیبی رینلڈز اور ٹیری جینک کی مشترکہ رہنمائی میں رضاکاروں کی ایک ٹیم نے دن رات کی محنت کے بعد مجموعی طور پر 19 ہزار 19 گالف گیندوں کو ایک خاص ترتیب میں جوڑ کر یہ دیو ہیکل اہرام بنایا۔

گالف گیندوں سے اہرام بنانے کا یہ کوئی پہلا واقعہ نہیں ہے، بلکہ اس سے قبل امریکی ریاست پینسلوینیا سے تعلق رکھنے والے زیکری کریوڈا نے سال 2022 میں 17 ہزار 575 گیندیں استعمال کرتے ہوئے یہ منفرد عالمی ریکارڈ اپنے نام کیا تھا۔ تاہم، اب ٹیکساس کی اس ٹیم نے 19 ہزار سے زائد گیندیں استعمال کر کے پرانا ریکارڈ باقاعدہ طور پر توڑ دیا ہے

دلچسپ بات یہ ہے کہ گالف بالز کی مدد سے موجودہ اہرام بنانے اور ریکارڈ قائم کرنے کی یہ شاندار کوشش ستمبر 2025 میں کی گئی تھی۔

گنیز بک آف ورلڈ ریکارڈز کی انتظامیہ کی جانب سے تمام تر گنتی، سائنسی پیمائش اور سخت ترین تصدیقی عمل کی تکمیل کے بعد اب چند روز قبل ہی باقاعدہ طور پر اس ریکارڈ کی منظوری دی گئی ہے اور اسے دنیا کا سب سے بڑا گالف بال اہرام تسلیم کر لیا گیا ہے۔

اس موقع پر ریکارڈ بنانے والے مائیکل فر اور ان کی ٹیم کا کہنا تھا کہ اتنی بڑی تعداد میں گیندوں کو بغیر گرائے ایک اہرام کی شکل دینا انتہائی صبر آزما اور اعصاب شکن کام تھا، لیکن عالمی اعزاز ملنے پر ان کی تمام تر تھکن دور ہو گئی ہے۔