امریکا میں کتوں کی سالانہ سرفنگ چیمپئن شپ کا انعقاد

امریکا میں کتوں کی 10 ویں سالانہ ‘ورلڈ ڈاگ سرفنگ چیمپئن شپ’ کا انعقاد کیا گیا جس میں مختلف نسلوں کے کتوں نے سمندری لہروں پر سرفنگ کی شاندار کارکردگی کا مظاہرہ کیا۔ شمالی کیلیفورنیا میں سان فرانسسکو سے 22 کلومیٹر جنوب میں واقع پیسیفیکا کے ساحل پر منعقدہ اس ایونٹ کو دیکھنے کے لیے سینکڑوں افراد جمع ہوئے۔ مقابلے میں چھوٹے اسپینیلز سے لے کر بڑے لیبراڈور تک تمام کتوں نے رنگ برنگی لائف جیکٹس پہن کر حصہ لیا۔ ججز نے سرف بورڈ پر کتوں کے توازن، لہروں کے سائز اور ان کے اعتماد کی بنیاد پر نتائج کا فیصلہ کیا۔ اس موقع پر پالتو جانوروں کی فلاح و بہبود کے لیے فنڈ ریزنگ اور انہیں گود لینے کی مہم بھی چلائی گئی۔ مقابلے کے دوران ہنٹنگٹن بیچ کی رہائشی صوفیہ سیڈلووسکی کے کتے ‘Rusty’ نے بھی لہروں پر توازن کا شاندار مظاہرہ کر کے تماشائیوں کے دل جیت لیے۔