شوہر کے مذاق میں کہے گئے الفاظ نے خاتون کی جان لے لی

بھارت کی ریاست اترپردیش کے دارالحکومت لکھنؤ کے اندرا نگر علاقے میں ایک افسوسناک واقعہ پیش آیا، جہاں ایک خاتون نے شوہر کے مزاحیہ انداز میں انہیں ’بندریا‘ کہنے پر دلبرداشتہ ہو کر خودکشی کر لی۔

ابتدائی تحقیقات کے مطابق واقعے کے وقت گھر کا ماحول خوشگوار تھا اور اہلِ خانہ ہنسی مذاق میں مصروف تھے۔ اسی دوران شوہر راہول سنگھ نے مذاقاً اپنی اہلیہ تنو سنگھ کو ’بندریا‘ کہہ دیا، جس پر وہ شدید صدمے کا شکار ہو گئیں اور غصے میں اپنے کمرے میں چلی گئیں۔

تنو سنگھ کی بہن انجلی کے مطابق اہلِ خانہ نے ابتدا میں یہی سمجھا کہ وہ کچھ دیر میں نارمل ہو جائیں گی، اس لیے کسی نے انہیں روکنے کی کوشش نہیں کی۔ تاہم تقریباً ایک گھنٹے بعد جب کھانے کے لیے بلایا گیا اور کوئی جواب نہ ملا تو کمرہ کھول کر دیکھا گیا، جہاں تنو سنگھ کی لاش پنکھے سے لٹکی ہوئی تھی۔

رپورٹس کے مطابق تنو سنگھ ماڈل بننے کی خواہشمند تھیں اور اپنے جسمانی حسن اور کیریئر کے حوالے سے خاصی حساس تھیں۔ پولیس کا کہنا ہے کہ شوہر کے مذاق کو وہ برداشت نہ کر سکیں، جس کے باعث یہ افسوسناک قدم اٹھایا گیا۔

اطلاع ملتے ہی پولیس موقع پر پہنچی، لاش کو تحویل میں لے کر پوسٹ مارٹم کے لیے بھجوا دیا گیا۔ پولیس کے مطابق ابتدائی تفتیش میں واقعہ گھریلو مذاق اور ہلکی جھڑپ کے بعد دل برداشتگی کا نتیجہ معلوم ہوتا ہے۔ پوسٹ مارٹم مکمل ہونے کے بعد لاش ورثا کے حوالے کر دی گئی ہے، جبکہ مزید قانونی کارروائی جاری ہے۔