ریچھ ہوٹل کے بند کمرے کا دروازہ توڑ کر زبردستی اندر گھس گیا

چین کے صوبے تبت کے علاقے نگچو میں ایک خوفناک اور انوکھا واقعہ پیش آیا ہے جہاں ایک ریچھ ہوٹل کی سیکیورٹی کو چکمہ دے کر عمارت کے اندر گھس آیا اور زبردستی ایک بند کمرے کا دروازہ توڑ کر اندر داخل ہو گیا۔ غیر ملکی خبر رساں ادارے کے مطابق، ہوٹل کے سیکیورٹی کیمروں کی فوٹیج میں دیکھا جا سکتا ہے کہ ریچھ پہلے ہوٹل کی راہداری میں گھومتا رہا اور پھر اس نے ایک کمرے کے دروازے کو زور لگا کر توڑ ڈالا جہاں دو مہمان ٹھہرے ہوئے تھے۔ کمرے میں موجود مہمانوں نے بتایا کہ وہ چند سیکنڈز تک خوف کی حالت میں ریچھ کو دیکھتے رہے، جس کے بعد وہ خود ہی کمرے سے باہر نکل گیا۔ اسی دوران ہوٹل کے مالک نے ٹارچ اور دیگر آلات کی مدد سے ریچھ کو خوفزدہ کر کے عمارت سے باہر بھگا دیا۔ واقعے کے بعد ہوٹل انتظامیہ نے توڑے گئے دروازے کی مرمت کر دی ہے اور آئندہ ایسے واقعات کو روکنے کے لیے مزید سخت حفاظتی اقدامات کرنے کا اعلان کیا ہے۔