ایک ہی کڑاہی میں پکوڑے اور چائے بنانے کی منفرد ویڈیو وائرل

سوشل میڈیا پر ایک انتہائی حیران کن اور انوکھی ویڈیو تیزی سے وائرل ہو رہی ہے، جس میں ایک دکاندار کو منفرد انداز میں پکوڑے اور چائے ایک ساتھ تیار کرتے ہوئے دیکھا جا سکتا ہے۔ وائرل ہونے والی اس ویڈیو میں دکاندار کڑھائی کے گرم تیل میں بیسن کے پکوڑے تلنے کے ساتھ ساتھ اسی کھولتے ہوئے تیل کے بیچوں بیچ چائے بھی تیار کر رہا ہے، جس نے دیکھنے والوں کو ورطۂ حیرت میں ڈال دیا ہے۔ ویڈیو شیئر کرنے والے صارف نے طنزیہ کیپشن لکھا کہ “یہ ٹیلنٹ سندھ سے باہر نہیں جانا چاہیے”۔ اس انوکھی “فوڈ انجینئرنگ” پر سوشل میڈیا صارفین کی جانب سے دلچسپ اور مزاحیہ تبصروں کا ایک طوفان آ گیا ہے۔ کچھ صارفین اسے “فرائی چائے” اور “پکوڑا چائے” کا نام دے رہے ہیں جبکہ کچھ کا مزاحیہ انداز میں پوچھنا ہے کہ “چائے آئل میں بنی ہے یا پکوڑے چائے میں تلے گئے ہیں؟” تاہم صارفین کی اکثریت اس دکاندار کے ایک ہی وقت میں دو کام نمٹانے کی مہارت کو داد دے رہی ہے۔