ویانا میں خاتون کا ٹوائلٹ فیس پر شہری انتظامیہ کے خلاف مقدمہ

آسٹریا کے دارالحکومت ویانا میں ایک 27 سالہ خاتون، میلانی گراڈک نے پبلک ٹوائلٹس کے استعمال پر صنف کی بنیاد پر مالی تفریق کا الزام عائد کرتے ہوئے شہری انتظامیہ کے خلاف باقاعدہ قانونی شکایت دائر کر دی ہے۔ خاتون کا بنیادی موقف ہے کہ شہری نظام کے تحت خواتین کو مجبوری کے تحت ٹوائلٹ کیبن استعمال کرنے کے لیے 50 سینٹ فیس ادا کرنا پڑتی ہے، جبکہ مردوں کے لیے پیشاب کے لیے یورینل (Urinals) کی سہولت بالکل مفت فراہم کی گئی ہے، جو شہر کے اینٹی ڈسکریمینیشن قوانین کی صریح ورزی ہے۔

شہری انتظامیہ کی ترجمان سینڈرا ہولزنگر نے اس پر وضاحت دیتے ہوئے کہا کہ ویانا میں واقع 168 عوامی بیت الخلا میں سے 29 پر عملہ تعینات ہے جہاں تمام افراد سے کیبن کے استعمال پر 50 سینٹ لیے جاتے ہیں، جبکہ یورینل صرف کھلے عام گندگی روکنے کے لیے مفت رکھے گئے ہیں۔ تاہم یونیورسٹی آف انسبرک کی ماہرِ قانون پروفیسر اینا گیمپر کے مطابق یہ انتظام مساوات کے اصولوں پر سنجیدہ سوالات اٹھاتا ہے، کیونکہ خواتین کو ان کی جسمانی ساخت یا حفاظتی ضروریات کی بنا پر مالی طور پر محروم نہیں کیا جانا چاہیے۔ دوسری جانب ویانا کی اتحادی حکومت کے معاہدے میں تمام پبلک ٹوائلٹس کو مفت کرنے کا جائزہ لینے کا وعدہ بھی شامل ہے۔