صدر مملکت لندن کا دورہ مکمل کرکے پاکستان کے لیے روانہ

صدرِ مملکت آصف علی زرداری برطانیہ میں ایک ہفتے سے زائد قیام کے بعد لندن سے پاکستان کے لیے روانہ ہو گئے ہیں۔ روانگی کے موقع پر ایئرپورٹ پر صحافیوں کی جانب سے خیریت سے متعلق پوچھے گئے سوال پر صدر زرداری نے مختصر جواب دیتے ہوئے کہا کہ “اللہ کا فضل ہے”، جبکہ اپنے قیام کے بارے میں گفتگو کرتے ہوئے ان کا کہنا تھا کہ “لندن میں اچھا وقت گزرا”۔ برطانیہ میں پاکستان کے ہائی کمشنر محمد فیصل اور ٹیپو عثمان نے ایئرپورٹ پر صدر مملکت کو رخصت کیا۔

ذرائع کے مطابق صدر آصف علی زرداری نے لندن قیام کے دوران اپنے مختلف طبی معائنے (Medical Check-ups) کرائے اور ان کا یہ دورہ مکمل طور پر ذاتی اور طبی نوعیت کا تھا۔ اس قیام کے دوران انہوں نے کسی قسم کی سیاسی سرگرمی میں حصہ نہیں لیا، تاہم ان کے فرزند اور چیئرمین پاکستان پیپلز پارٹی بلاول بھٹو زرداری اور صاحبزادی بختاور بھٹو زرداری ان سے ملنے کے لیے لندن پہنچتے رہے۔ واضح رہے کہ یہ تقریباً چھ سال بعد صدر آصف علی زرداری کا برطانیہ کا کوئی پہلا دورہ تھا۔