پاکستان اور اے ڈی بی کا ایم ایل ون منصوبے کے ڈیزائن کی بروقت تکمیل پر اتفاق

وفاقی وزیر برائے اقتصادی امور احد خان چیمہ اور ایشیائی ترقیاتی بینک (ADB) کے اعلیٰ سطح کے وفد کے درمیان ایک اہم ملاقات ہوئی، جس میں پاکستان کے تاریخی بنیادی ڈھانچے کے اہم ترین پروجیکٹ مین لائن ون (ML-1) ریلوے منصوبے کی جلد از جلد عملی شروعات اور تکنیکی تقاضوں پر تفصیلی تبادلہ خیال کیا گیا۔ اجلاس کے دوران ایم ایل ون کے انجینئرنگ ڈیزائن، مستقبل کے مراحل، تمام متعلقہ منظوریوں، پروکیورمنٹ (خریداری کے عمل) اور دیگر اہم تکنیکی و قانونی ضوابط کا باریک بینی سے جائزہ لیا گیا۔

ملاقات میں ایشیائی ترقیاتی بینک کے حکام نے آگاہ کیا کہ اے ڈی بی کی تکنیکی ٹیمیں اور بین الاقوامی کنسلٹنٹس منصوبے پر دن رات کام کر رہے ہیں اور رواں سال اکتوبر (2026) تک ایم ایل ون کے حتمی ڈیزائن کی تیاری مکمل کرنے کی ہر ممکن کوشش کی جائے گی، جس کے فوراً بعد پروکیورمنٹ کا باقاعدہ مرحلہ شروع کر دیا جائے گا۔ اس موقع پر وفاقی وزیر احد چیمہ نے کہا کہ وزیراعظم محمد شہباز شریف ایم ایل ون پروجیکٹ کو ملک کی معاشی ترقی کے لیے انتہائی اہمیت دیتے ہیں اور چاہتے ہیں کہ تمام ضابطہ جاتی تقاضے پورے کرتے ہوئے منصوبے کے کام کو تیزی سے آگے بڑھایا جائے تاکہ یہ معاشی منصوبہ جلد عملی شکل اختیار کر سکے