پراسیکیوشن پنجاب اور ویمن پروٹیکشن اتھارٹی کا مشترکہ اقدامات مزید مؤثر بنانے کا فیصلہ

پنجاب میں خواتین کو انصاف کی تیز رفتار فراہمی اور ان کے قانونی حقوق کے تحفظ کو یقینی بنانے کے لیے محکمہ پراسیکیوشن پنجاب اور پنجاب ویمن پروٹیکشن اتھارٹی (WPA) نے اپنے مشترکہ اقدامات کو مزید مؤثر اور فعال بنانے کا اہم فیصلہ کیا ہے۔ اس سلسلہ میں پراسیکیوٹر جنرل پنجاب چودھری عرفان صادق تارڑ کی زیرِ صدارت ایک اعلیٰ سطحی اجلاس منعقد ہوا، جس میں صوبائی وزیر برائے پراسیکیوشن پنجاب رانا بلال احمد، چیئرپرسن ویمن پروٹیکشن اتھارٹی حنا پرویز بٹ اور ڈپٹی اٹارنی جنرل پاکستان راجہ خرم شہزاد سمیت دیگر سینئر انتظامی افسران نے شرکت کی۔ اجلاس میں خواتین کے خلاف ہونے والے جراٸم اور متنازع مقدمات میں بروقت اور بلا تاخیر انصاف کی فراہمی کے طریقہ کار کا تفصیلی جائزہ لیا گیا۔

اجلاس کے دوران دونوں اداروں کے درمیان شعبہ جاتی تعاون اور باہمی رابطہ کاری کو مزید مضبوط بنانے پر مکمل اتفاق کیا گیا۔ پراسیکیوٹر جنرل چودھری عرفان صادق تارڑ نے کہا کہ خواتین کے مقدمات کی مؤثر اور مضبوط پیروکاری محکمہ پراسیکیوشن کی اولین ترجیحات میں شامل ہے اور ویمن پروٹیکشن اتھارٹی کے ساتھ مربوط نظام کے تحت مظلوم خواتین کو فوری انصاف فراہم کیا جائے گا۔ وزیر پراسیکیوشن رانا بلال احمد اور چیئرپرسن حنا پرویز بٹ نے مشترکہ کاوشوں کو سراہتے ہوئے عزم ظاہر کیا کہ پنجاب میں خواتین کے حقوق کے تحفظ کے لیے تمام دستیاب قانونی وسائل کو یکجا کر کے استعمال میں لایا جائے گا۔