آزاد کشمیر ہائی کورٹ کا 10 روز میں انٹرنیٹ سروس بحال کرنے کا حکم

آزاد جموں و کشمیر ہائی کورٹ نے حکومت کو ریاست کے بیشتر حصوں میں فوری اقدامات اٹھاتے ہوئے آئندہ 10 روز کے اندر اندر انٹرنیٹ سروس بحال کرنے کی سخت ہدایت جاری کر دی ہے۔ ہائی کورٹ نے اپنے فیصلے میں واضح کیا ہے کہ جن اضلاع اور حساس علاقوں میں امن و امان کے حالات سازگار نہیں ہیں، صرف ان مخصوص مقامات کے سوا ریاست کے تمام باقی تمام علاقوں میں فائبر و موبائل انٹرنیٹ سروسز کو 10 دن کی مہلت کے اندر مکمل طور پر بحال کیا جائے۔

یہ اہم احکامات آزاد کشمیر ہائی کورٹ کے جج جسٹس شاہد بہار نے بدھ کے روز انٹرنیٹ کی مسلسل معطلی کے خلاف آزاد کشمیر بار ایسوسی ایشن اور ایک مقامی شہری کی جانب سے دائر کی جانے والی الگ الگ آئینی درخواستوں کو یکجا کر کے ابتدائی سماعت کے دوران جاری کیے۔ سماعت کے دوران عدالتِ عالیہ نے انتظامیہ اور حکومتِ آزاد کشمیر کو زبانی احکامات دیتے ہوئے شہریوں کو درپیش مشکلات کا ازالہ کرنے اور تعلیمی و تجارتی سرگرمیوں کو جاری رکھنے کے لیے سروسز کی فوری بحالی کا حکم دیا، جبکہ بدامنی کا شکار مخصوص علاقوں کو عارضی طور پر اس حکم سے استثنیٰ حاصل ہو گا۔