مقبوضہ مغربی کنارے میں اسرائیلی آبادکاروں کا فلسطینی خاندانوں کے گھروں کا محاصرہ

مقبوضہ مغربی کنارے کے گاؤں قصرا میں غیر قانونی اسرائیلی آبادکاروں نے تین فلسطینی خاندانوں کی رہائش گاہوں کا محاصرہ کر کے سڑکیں بند کر دیں اور ان کے پانی اور بجلی کے کنکشن منقطع کر دیے ہیں۔ اقوامِ متحدہ کے مطابق اس محاصرے کی وجہ سے دو بچوں سمیت تقریباً 15 فلسطینی اپنے ہی گھروں میں محصور ہو کر رہ گئے ہیں اور بنیادی انسانی ضروریات سے محروم ہیں، جبکہ آبادکاروں کی جانب سے ان کے گھروں پر پتھراؤ بھی کیا گیا۔

رپورٹس کے مطابق اسرائیلی فوج نے کارروائی کرتے ہوئے دو غیر قانونی چوکیوں کو ختم کرنے اور ایک اسرائیلی کو حراست میں لینے کا دعویٰ کیا ہے، تاہم مقامی باشندوں کا کہنا ہے کہ مسلح اور غیر قانونی آبادکار اب بھی قریبی علاقوں میں گھوم رہے ہیں اور خطرہ برقرار ہے۔

اس ہولناک واقعے پر شدید ردِعمل دیتے ہوئے امریکی سفیر مائیک ہکابی نے آبادکاروں کے ان اقدامات کی سخت الفاظ میں مذمت کی اور اسے “خوفناک اور ناقابلِ جواز” قرار دیا۔ امریکی سفیر نے واضح کیا کہ نہتے خاندانوں کو خوفزدہ اور ہراساں کرنے کے لیے دہشت گردی کے ایسے گھناؤنے افعال میں ملوث عناصر کسی رعایت کے مستحق نہیں ہیں۔