وزیراعظم شہباز شریف سے ناروے کے وزیر خارجہ کی ملاقات، دوطرفہ تعلقات پر تبادلہ خیال

وزیراعظم شہباز شریف سے ناروے کے وزیر خارجہ نے اسلام آباد میں اہم ملاقات کی، جس کے دوران پاکستان اور ناروے کے درمیان دوطرفہ تعلقات کی موجودہ صورتحال، تجارتی تعاون اور علاقائی و عالمی امور پر تفصیلی گفتگو کی گئی۔

ملاقات کے دوران وزیراعظم نے دونوں ممالک کے مضبوط روابط پر اطمینان کا اظہار کرتے ہوئے نارویجن کمپنیوں کو پاکستان کے تیل اور گیس کی تلاش (Oil & Gas Exploration) کے شعبے میں سرمایہ کاری کی باضابطہ دعوت دی۔ وزیراعظم نے خاص طور پر مسئلہ فلسطین پر ناروے کے مضبوط، اصولی اور واضح مؤقف کی تعریف کی اور امن قائم کرنے کی کوششوں میں پاکستان کی مسلسل حمایت پر نارویجن حکومت کا شکریہ ادا کیا۔

ناروے کے وزیر خارجہ نے پرتپاک استقبال پر وزیراعظم شہباز شریف کا شکریہ ادا کرتے ہوئے ناروے میں مقیم پاکستانی برادری کے مثبت اور متحرک کردار کی تعریف کی۔ اس موقع پر وزیراعظم شہباز شریف نے ناروے کے وزیراعظم کو جلد پاکستان کا دورہ کرنے کی دعوت بھی دی۔