امریکا میں طالب علم کی ریکارڈ ساز کارکردگی، جی پی اے پیمائشی نظام کی تبدیلی پر غور

امریکا میں ایک طالب علم کی جانب سے ریکارڈ توڑ 11.99 جی پی اے (GPA) حاصل کرنے کے بعد گریڈ پوائنٹ ایوریج کے موجودہ نظام کو تبدیل کرنے پر غور کیا جا رہا ہے۔ ریاست فلوریڈا کے اسٹین برینر ہائی اسکول سے ویلڈیکٹورین (سب سے نمایاں طالب علم) کی حیثیت سے گریجویٹ ہونے والے ویبھاو بھاسکر نے 11.99 جی پی اے حاصل کر کے 2022 کا 11.84 جی پی اے کا ریاستی ریکارڈ توڑ دیا ہے۔ ویبھاو بھاسکر اتنی غیر معمولی جی پی اے حاصل کرنے میں اس لیے کامیاب رہے کیونکہ ہِلزبرو کاؤنٹی کی تعلیمی پالیسی کے تحت ایڈوانسڈ پلیسمنٹ (AP) اور ڈوئل انرولمنٹ کورسز کے لیے معمول کے 4.0 اسکور سے زیادہ اضافی پوائنٹس دیے جاتے تھے۔ انہوں نے اپنے ہائی اسکول کے دوران 20 اے پی کورسز کرنے کے ساتھ ساتھ یونیورسٹی آف فلوریڈا کے آن لائن پروگرام کے ذریعے 24 ڈوئل انرولمنٹ کالج کورسز بھی مکمل کیے، جو کہ ایک ایسوسی ایٹ ڈگری کے برابر ہیں۔ مقامی میڈیا سے گفتگو کرتے ہوئے انہوں نے بتایا کہ جب انہوں نے ٹاپ پوزیشن حاصل کرنے کا فیصلہ کیا تو انہوں نے اسکول کا پورا نصاب پڑھنے کے ساتھ ساتھ ہر مشکل ترین تعلیمی موقع کا بھرپور فائدہ اٹھایا۔