امریکا: چار رکنی ٹیم نے ڈسک گالف کا نیا عالمی ریکارڈ بنا دیا

امریکی ریاست آئیڈاہو میں چار رکنی ٹیم نے ڈسک گالف کا ایک ہول انتہائی تیز رفتاری سے مکمل کر کے نیا گنیز ورلڈ ریکارڈ اپنے نام کر لیا ہے۔ یہ منفرد کارنامہ معروف ریکارڈ ہولڈر ڈیوڈ رش، ان کے دوست ٹریوس ڈیوڈسن اور ان کے دو بیٹوں اینڈرز اور اولیور نے مل کر انجام دیا۔ گنیز ورلڈ ریکارڈز کے ضوابط کے مطابق ہول کا فاصلہ کم از کم 200 میٹر ہونا ضروری تھا، جس کے لیے ٹیم نے مالارڈ پارک میں واقع پی ڈی جی اے سے منظور شدہ کورس کا انتخاب کیا۔

اس تاریخی کامیابی کو حاصل کرنے کے لیے ٹیم کو مسلسل 60 مرتبہ کوششیں کرنا پڑیں۔ ابتدائی درجنوں کوششیں ناکام ہونے کے بعد 60 ویں کوشش میں تمام کھلاڑیوں کے شاٹس بالترتیب بہترین ثابت ہوئے۔ ڈیوڈ رش کی مضبوط ڈرائیو کے بعد ٹریوس اور اولیور نے ڈسک کی رفتار برقرار رکھی، جبکہ اینڈرز نے اسے ہدف کے بالکل قریب پہنچا دیا۔ آخر میں ڈیوڈ رش نے 41 سیکنڈ تک اونچائی کی طرف تیز دوڑ لگا کر ڈسک اٹھائی اور اسے باسکٹ میں ڈال کر محض 44.31 سیکنڈز میں کھیل مکمل کیا۔ مسلسل محنت سے حاصل ہونے والے اس کارنامے کو ڈسک گالف کی دنیا میں ایک نمایاں سنگ میل قرار دیا جا رہا ہے۔