آوارہ کتوں کیخلاف ایکشن نہ لینےپر مظاہرین نے انتظامیہ کے دفتر میں کتے چھوڑ دیے

بھارت میں عوامی احتجاج کا ایک انتہائی دلچسپ اور انوکھا واقعہ پیش آیا ہے جہاں آوارہ کتوں کی بڑھتی ہوئی تعداد اور انتظامیہ کی عدم توجہی سے تنگ آئے مظاہرین نے میونسپل افسر کے دفتر میں ہی زندہ کتے چھوڑ دیے۔ یہ واقعہ بھارتی ریاست مہاراشٹرا کے ضلع ناسک کی تحصیل نپھاڑ میں پیش آیا، جہاں مقامی شہری اور سیاسی کارکن آوارہ کتوں کے حملوں اور انتظامی بے حسی کے خلاف احتجاج کر رہے تھے۔

مظاہرین نپھاڑ نگر پنچایت کے چیف ایگزیکٹو آفیسر دھیرج بھامرے کے دفتر میں داخل ہوئے اور ان سے شدید احتجاج کیا۔ اس دوران ‘یوا سینا’ کے ضلعی سربراہ وکرم راندھوے نے ایک بوری میں لائے گئے آوارہ کتوں کو افسر کی میز پر ہی آزاد کر دیا، جس سے دفتر میں افراتفری مچ گئی۔ یہی نہیں بلکہ احتجاج کے دوران مظاہرین نے چیف آفیسر کو نوٹوں کی مالا پہنانے کی بھی کوشش کی۔ مظاہرین کا کہنا تھا کہ علاقے میں آوارہ کتوں کے کاٹنے کے واقعات میں روز بروز اضافہ ہو رہا ہے جس سے بچوں، بزرگوں اور سواریوں کو شدید خطرات لاحق ہیں، تاہم بار بار کی شکایت کے باوجود انتظامیہ کسی قسم کی مؤثر کارروائی کرنے میں ناکام رہی ہے۔