اقوام متحدہ کی مقبوضہ مغربی کنارے اسرائیلی بستیوں کے توسیعی منصوبے کی شدید مذمت

اقوام متحدہ کے سیکرٹری جنرل انتونیو گوتریس نے مقبوضہ مغربی کنارے میں اسرائیلی بستیوں کی توسیع کے غیر قانونی منصوبوں کی سخت الفاظ میں مذمت کی ہے۔ اپنے ایک اہم بیان میں سیکرٹری جنرل نے واضح کیا کہ فلسطینی علاقوں میں اسرائیلی آبادکاروں کی قائم کردہ یہ بستیاں بین الاقوامی قانون کی شدید اور کھلی خلاف ورزی ہیں۔

انتونیو گوتریس نے زور دے کر کہا کہ مقبوضہ علاقوں میں قائم اسرائیلی بستیوں کی کوئی قانونی حیثیت نہیں ہے اور یہ خطے میں پائیدار امن کی راہ میں سب سے بڑی رکاوٹ بنی ہوئی ہیں۔ انہوں نے خبردار کیا کہ اسرائیل کی مسلسل آبادکاری کی پالیسی نہ صرف ‘دو ریاستی حل’ کو نقصان پہنچا رہی ہے بلکہ یہ اسرائیلی اور فلسطینی عوام کے درمیان ایک منصفانہ، دیرپا اور جامع امن کے قیام کو ناممکن بنا رہی ہے۔

اقوام متحدہ کے سربراہ نے عالمی برادری سے اپیل کرتے ہوئے ایک بار پھر عام شہریوں کے تحفظ اور بین الاقوامی انسانی حقوق و انسانی قوانین کی پاسداری کو یقینی بنانے کا مطالبہ کیا۔ انہوں نے اس بات پر بھی زور دیا کہ ان بین الاقوامی قوانین اور انسانی حقوق کی خلاف ورزی کرنے والوں کا بلا تفریق احتساب کیا جانا چاہیے۔