اسرائیلی فوج کا انروا کے دفتر پر دھاوا، عملے کو حراست میں لے لیا

اسرائیلی افواج نے مشرقی یروشلم میں واقع اقوام متحدہ کی امدادی ایجنسی برائے فلسطینی مہاجرین (UNRWA/انروا) کے دفتر پر حملہ کر دیا۔ کارروائی کے دوران اسرائیلی اہلکاروں نے آنسو گیس کی شیلنگ اور دست بموں کا آزادانہ استعمال کیا اور انروا کے عملے کے کئی ارکان کو حراست میں لے لیا۔

دوسری جانب مقبوضہ مغربی کنارے میں بھی قابض اسرائیلی فورسز کی جانب سے چھاپوں، گرفتاریوں اور فلسطینیوں کے گھروں کو مسمار کرنے کا سلسلہ مزید تیز کر دیا گیا ہے۔ نابلس، جنین اور دیگر ملحقہ علاقوں میں کی گئی کارروائیوں کے دوران 120 سے زائد فلسطینیوں کو گرفتار کر کے نامعلوم مقام پر منتقل کر دیا گیا ہے۔ رپورٹس کے مطابق، انتہا پسند یہودی آباد کاروں نے بھی متعدد فلسطینی دیہات پر پرتشدد حملے کیے اور وہاں موجود مساجد کو نذرِ آتش کرنے کی کوشش کی۔

ان بڑھتے ہوئے مظالم پر شدید تشویش کا اظہار کرتے ہوئے فلسطینی صدر محمود عباس نے عالمی برادری سے فوری مداخلت کا مطالبہ کیا ہے تاکہ بے گناہ فلسطینی عوام کے تحفظ کو یقینی بنایا جا سکے۔ ادھر متحدہ عرب امارات (یو اے ای) نے بھی اسرائیلی آباد کاروں اور قابض افواج کے ان جارحانہ اقدامات کی شدید الفاظ میں مذمت کی ہے اور اقوام متحدہ سے فلسطینیوں کی حفاظت کے لیے فوری اقدامات کرنے کی اپیل کی ہے۔