شہباز شریف سے چینی سفیر کی ملاقات، سٹریٹجک شراکت داری مزید مضبوط بنانے کے عزم کا اعادہ

وزیراعظم شہباز شریف سے پاکستان میں متعین چینی سفیر جیانگ زائی ڈونگ نے اسلام آباد میں ملاقات کی۔ اس اہم ملاقات میں نائب وزیراعظم و وزیر خارجہ اسحاق ڈار، وفاقی وزیر منصوبہ بندی احسن اقبال، وزیراعظم کے مشیر ڈاکٹر سید توقیر شاہ اور سیکرٹری خارجہ سفیر آمنہ بلوچ بھی موجود تھیں۔

ملاقات کے دوران وزیراعظم نے چین کے صدر شی جن پنگ اور وزیراعظم لی چیانگ کے لیے نیک تمناؤں کا پیغام پہنچایا اور پاکستان و چین کے درمیان ہمہ جہت سٹریٹجک تعاون پر مبنی شراکت داری کو نئی بلندیوں تک لے جانے کی عزم کا اعادہ کیا۔ وزیراعظم نے اپنے حالیہ دورۂ چین کا ذکر کرتے ہوئے اس بات پر زور دیا کہ دونوں ممالک کی اعلیٰ قیادت کے درمیان طے پانے والے تمام فیصلے اور معاہدوں پر بلا تاخیر عملدرآمد یقینی بنایا جائے گا۔

اس موقع پر فریقین نے مشرق وسطیٰ، افغانستان اور جنوبی ایشیا سمیت خطے کی مجموعی صورتحال پر بھی تفصیل سے تبادلۂ خیال کیا۔ چینی سفیر جیانگ زائی ڈونگ نے پاکستان کو چین کا “آہنی بھائی” قرار دیتے ہوئے یقین دہانی کرائی کہ چین، پاکستان کی معاشی و سماجی ترقی کو فروغ دینے کے لیے اپنا بھرپور تعاون جاری رکھے گا۔