استحکام پاکستان پارٹی کے ایل اے 6 کے امیدوار علی شان سونی گرفتار

آزاد کشمیر کے حلقہ ایل اے 6 (بھمبر) سے استحکام پاکستان پارٹی (آئی پی پی) کے امیدوار اور سابق وزیر علی شان سونی کو پولیس نے گرفتار کر لیا ہے۔

ایس ایس پی بھمبر کے مطابق علی شان سونی پر پولنگ اسٹیشن کو آگ لگانے اور عملے سے بیلٹ بکس چھیننے کا سنگین الزام ہے۔ پولیس نے فوری کارروائی کرتے ہوئے ملزم کے قبضے سے پولنگ اسٹیشن سے اٹھائے گئے تمام بیلٹ بکس اور دیگر انتخابی سامان کو ضبط کر کے اپنی تحویل میں لے لیا ہے۔

پولیس حکام کا مزید کہنا ہے کہ واقعے کے بعد قانون نافذ کرنے والے اداروں نے کارروائی کرتے ہوئے سابق وزیر علی شان سونی سمیت مجموعی طور پر 24 افراد کے خلاف نامزد مقدمہ درج کر لیا ہے اور مزید تحقیقات کا آغاز کر دیا گیا ہے۔