نائجیریا میں مسلح افراد کا گاؤں پر حملہ، 30 افراد ہلاک، متعدد مکان نذر آتش

نائجیریا کی شمال مغربی ریاست کدونا کے ایک گاؤں پر مسلح افراد کے خونریز حملے کے نتیجے میں کم از کم 30 افراد ہلاک جبکہ 4 افراد شدید زخمی ہو گئے ہیں۔

بین الاقوامی خبر ایجنسی کے مطابق مسلح حملہ آوروں نے اچانک گاؤں پر دھاوا بولا اور اندھا دھند فائرنگ کرنے کے ساتھ ساتھ متعدد مکانات کو بھی آگ لگا کر نذرِ آتش کر دیا۔ رپورٹس کے مطابق جاں بحق ہونے والوں میں خواتین، مرد اور 8 کمسن بچے شامل ہیں۔ واقعے کے بعد زخمیوں کو فوری طور پر طبی امداد کی فراہمی کے لیے قریبی ہسپتال منتقل کر دیا گیا ہے۔

مقامی حکام کا کہنا ہے کہ اس المناک واقعے کے بعد علاقے میں سیکیورٹی ہائی الرٹ کر دی گئی ہے اور اضافی نفری تعینات کر دی گئی ہے، جبکہ حملہ آوروں کی تلاش اور واقعے کی تحقیقات کا سلسلہ جاری ہے۔