سعودی عرب پر حملہ: عراقی وزیراعظم نے تحقیقات کا حکم دیدیا

عراقی سرزمین کا استعمال کرتے ہوئے سعودی عرب پر کیے جانے والے حملے کے بعد عراقی وزیراعظم نے معاملے کا سخت نوٹس لیتے ہوئے اعلیٰ سطحی تحقیقات کا حکم دے دیا ہے۔

اطلاعات کے مطابق یہ ڈرون حملہ عراق کے اندر موجود ایرانی حمایت یافتہ ملیشیا کی جانب سے کیا گیا۔ واقعہ کے فوری بعد دفترِ عراقی وزیراعظم سے جاری کردہ ایک بیان میں واضح کیا گیا ہے کہ حکومتِ عراق کسی بھی گروہ یا ملیشیا کو اس بات کی ہرگز اجازت نہیں دے گی کہ وہ عراقی سرزمین کو ہمسایہ ممالک کے خلاف جارحانہ حملوں اور خطے کا امن خراب کرنے کے لیے استعمال کرے۔

بیان میں مزید کہا گیا ہے کہ عراقی سیکیورٹی اور تحقیقاتی ادارے واقعے کی مکمل اور شفاف تحقیقات کر رہے ہیں تاکہ اس میں ملوث عناصر کی نشاندہی کر کے انہیں قانون کے کٹہرے میں لایا جا سکے۔