انتخابی عمل کا پہلا مرحلہ آزادانہ اور شفافیت سے مکمل ہوا:چیف الیکشن کمشنر آزاد کشمیر

چیف الیکشن کمشنر آزاد جموں و کشمیر جسٹس (ر) غلام مصطفیٰ مغل نے اعلان کیا ہے کہ آزاد کشمیر کے عمومی انتخابات کا پہلا مرحلہ مکمل طور پر آزادانہ، منصفانہ اور شفاف انداز میں مکمل ہو گیا ہے۔ ایک اہم پریس کانفرنس سے خطاب کرتے ہوئے انہوں نے بتایا کہ تمام سیاسی جماعتوں نے الیکشن میں بھرپور حصہ لیا اور پولنگ کا پورا عمل پرامن ماحول میں انجام پایا۔

چیف الیکشن کمشنر نے عوام کے جوش و خروش کو سراہتے ہوئے کہا کہ شہریوں نے بڑی تعداد میں باہر نکل کر اپنے حقِ رائے دہی کا استعمال کیا۔ انہوں نے واضح کیا کہ جہاں کہیں بے ضابطگی کی کوشش کی گئی، وہاں فوری ایکشن لیا گیا؛ بالخصوص سماہنی کے علاقے میں پولنگ کے عمل میں خلل ڈالنے والے عناصر کو موقع پر ہی گرفتار کر لیا گیا۔

جسٹس (ر) غلام مصطفیٰ مغل نے انتخابات کو امن و امان کے ساتھ مکمل کروانے پر سیکیورٹی اداروں کی کارکردگی کی تعریف کرتے ہوئے کہا کہ پولنگ کے دوران امن و امان کی بحالی کے لیے قانون نافذ کرنے والے اداروں کا کردار نہایت مثالی اور قابلِ تحسین رہا۔