صدر پوتن نے روسی فوج میں 25 ہزار اہلکاروں کے اضافے کی منظوری دے دی

روسی صدر ولادیمیر پوتن نے ایک نئے صدارتی فرمان پر دستخط کرتے ہوئے روسی مسلح افواج کی مجموعی نفری میں مزید اضافے کی منظوری دے دی ہے۔ اس فیصلے کے تحت روسی فوج میں 25 ہزار نئے فوجی اہلکاروں کو شامل کیا جائے گا۔

جاری کردہ صدارتی فرمان کے مطابق، اس اضافے کے بعد روسی مسلح افواج کی مجموعی نفری بڑھ کر 24 لاکھ 26 ہزار 130 ہو جائے گی، جس میں سے باقاعدہ فعال فوجی اہلکاروں کی تعداد 15 لاکھ 35 ہزار پر پہنچ جائے گی۔ فرمان میں فوج کی کل نفری میں مجموعی طور پر 27 ہزار افراد کا اضافہ کیا گیا ہے، جن میں 25 ہزار فوجی اہلکار جبکہ باقی دیگر معاون اور انتظامی عملے پر مشتمل ہیں۔

کریملن کی جانب سے جاری تفصیلات کے مطابق یہ صدارتی فرمان یکم اگست سے باضابطہ طور پر نافذ العمل ہوگا۔ فرمان کے تحت روسی وزارتِ دفاع کے مرکزی دفتر کے عملے کی زیادہ سے زیادہ حد 13 ہزار 400 مقرر کی گئی ہے (جس میں سیکیورٹی گارڈز اور دیگر نچلا عملہ شامل نہیں)۔ دستاویز میں مزید بتایا گیا ہے کہ وزارتِ دفاع کے مرکزی دفتر میں 4 ہزار 930 سویلین سرکاری ملازمین اپنی ذمہ داریاں انجام دیں گے۔