اسرائیلیوں کی آباد کاری، صیہونی فورسز نے فلسطینیوں کی زمینوں پر قبضے تیز کردیئے

اسرائیلیوں کی غیر قانونی آباد کاری کو فروغ دینے کے لیے اسرائیلی فورسز نے مقبوضہ فلسطینی علاقوں میں فلسطینیوں کی زمینوں اور جائیدادوں پر قبضے کے عمل کو مزید تیز کر دیا ہے۔

عرب میڈیا کی رپورٹس کے مطابق، اسرائیلی فورسز نے رام اللہ کے مغرب میں فلسطینیوں کے گھروں پر بلڈوزر چلا کر انہیں مسمار کر دیا، جبکہ بیت حنینا قصبے میں بغیر اجازت نامے تعمیرات کا بہانہ بنا کر متعدد عمارتوں کو ڈھاہ دیا گیا۔ اس کے علاوہ نابلس میں فلسطینیوں کی معیشت کا اہم ذریعہ سمجھے جانے والے زیتون کے سرسبز کھیتوں اور باغات کو بھی بے دردی سے تباہ کر دیا گیا۔

دوسری جانب، متحدہ عرب امارات (یو اے ای) نے مقبوضہ علاقوں میں اسرائیلی آباد کاروں کے بڑھتے ہوئے حملوں اور جارحیت کی سخت الفاظ میں مذمت کی ہے۔ اماراتی وزارتِ خارجہ نے بین الاقوامی برادری سے فوری مداخلت کا مطالبہ کرتے ہوئے کہا ہے کہ فلسطینیوں کی اراضی پر قبضے اور تشدد کو روکنے کے لیے عالمی برادری مؤثر اقدامات کرے۔