پاسداران انقلاب کو دہشتگرد تنظیم قرار دینے کیلئے قانون سازی کریں گے: برطانیہ

برطانوی وزیراعظم کیئر اسٹارمر نے اعلان کیا ہے کہ وہ ایران کی پاسدارانِ انقلاب (IRGC) کو باقاعدہ طور پر دہشت گرد تنظیم قرار دینے کے لیے چند ہفتوں میں قانون سازی کریں گے۔ فنانشل ٹائمز کی رپورٹ کے مطابق، اس اقدام کا مقصد یہودی گروہوں اور ایران کی موجودہ مذہبی حکومت کے مخالفین کے دیرینہ مطالبات کو پورا کرنا ہے۔

برطانیہ کی پارلیمانی تاریخ میں یہ اپنی نوعیت کا پہلا موقع ہوگا کہ کسی دوسرے ملک کی باضابطہ مسلح فوج کو ‘ٹیررازم ایکٹ’ کے تحت دہشت گرد قرار دیا جائے گا۔ اس سے قبل برطانیہ میں صرف غیر ریاستی عناصر اور مسلح گروہوں کو ہی اس زمرے میں شامل کیا جاتا رہا ہے۔ واضح رہے کہ یورپی یونین پہلے ہی فروری میں پاسدارانِ انقلاب کو دہشت گرد قرار دینے کا اصولی فیصلہ کر چکی ہے۔

دوسری جانب، جرمن چانسلر فریڈرک مرز نے ایک مختلف سفارتی پہلو پر روشنی ڈالتے ہوئے کہا ہے کہ اگر مذاکرات میں مثبت پیش رفت ہوتی ہے تو یورپی یونین ایران پر عائد پابندیوں میں نرمی کے لیے تیار ہے۔ ان کا کہنا تھا کہ جامع معاہدے کی صورت میں مرحلہ وار پابندیاں ختم کی جا سکتی ہیں، جس سے مستقبل کے مذاکرات کو آگے بڑھانے میں خاطر خواہ مدد ملے گی۔