اسرائیل کے وحشیانہ حملے، 6 پولیس اہلکاروں سمیت مزید 12 فلسطینی شہید

دہشت گرد اسرائیل کے نہتے فلسطینیوں پر وحشیانہ حملے جاری ہیں، جس کے نتیجے میں 6 پولیس اہلکاروں سمیت مزید 12 فلسطینی شہید اور متعدد زخمی ہو گئے۔ یہ جانی نقصان ایک ایسے وقت میں ہوا ہے جب خطے میں جنگ بندی کے دعووں کے باوجود زمینی صورتحال انتہائی کشیدہ ہے۔

طبی ذرائع کے مطابق غزہ سٹی میں ایک فضائی حملے کے دوران تین افراد جان بحق ہوئے، جن میں دو پولیس اہلکار بھی شامل تھے۔ اسی طرح شمالی غزہ کے علاقے بیت لاہیا میں صیہونی فوج کی جانب سے ٹینک سے گولہ باری کی گئی، جس کی زد میں آ کر مزید دو فلسطینی جام شہادت نوش کر گئے۔

ادھر جنوبی شہر خان یونس میں ہونے والے ایک بڑے حملے میں سات افراد کی شہادت کی تصدیق ہوئی ہے، جن میں چار پولیس اہلکار شامل تھے۔ غزہ کی وزارتِ داخلہ نے اپنے بیان میں موقف اختیار کیا ہے کہ اسرائیلی فورسز کی جانب سے پولیس اہلکاروں کو دانستہ طور پر نشانہ بنایا جا رہا ہے۔ عینی شاہدین کے مطابق خان یونس میں کارروائی ایک شادی ہال کے قریب کھڑی پولیس گاڑی پر کی گئی، جس سے علاقے میں شدید خوف و ہراس پھیل گیا۔