ایرانی وزیرِ خارجہ عباس عراقچی کی آج وزیراعظم شہباز شریف سے ملاقات متوقع

پاکستان کی ثالثی میں جاری امریکہ-ایران امن مشن کے سلسلے میں اہم پیش رفت سامنے آئی ہے۔ سفارتی ذرائع کے مطابق، ایرانی وزیرِ خارجہ عباس عراقچی آج سہ پہر تقریباً 4:00 بجے وزیراعظم شہباز شریف سے ملاقات کریں گے۔ اس اہم ملاقات میں علاقائی امن، سلامتی اور دوطرفہ امور پر تفصیلی مشاورت کی جائے گی۔

سفارتی ذرائع نے واضح کیا ہے کہ عباس عراقچی کی اسلام آباد میں کسی بھی امریکی وفد سے براہِ راست ملاقات طے نہیں ہے۔ وہ وزیراعظم سے ملاقات کے بعد آج شام ہی اپنے وفد کے ہمراہ اسلام آباد سے مسقط (عمان) کے لیے روانہ ہو جائیں گے، جہاں سے وہ اپنے طے شدہ شیڈول کے مطابق ماسکو کا دورہ بھی کریں گے۔

دوسری جانب، وائٹ ہاؤس کے اعلان کے مطابق سٹیو وٹکاف اور جیرڈ کشنر پر مشتمل اعلیٰ سطح کا امریکی وفد آج شام اسلام آباد پہنچ رہا ہے۔ اگرچہ دونوں وزراء کے درمیان براہِ راست ملاقات کا کوئی باضابطہ شیڈول سامنے نہیں آیا، تاہم ایک ہی وقت میں دونوں ممالک کے وفود کی پاکستان میں موجودگی اور پاکستانی قیادت سے ملاقاتیں خطے میں کشیدگی کم کرنے کی کوششوں میں پاکستان کے کلیدی کردار کو واضح کرتی ہیں۔