حکومت نے پیٹرول اور ڈیزل کی قیمتوں میں بڑا اضافہ کردیا

حکومت نے پیٹرولیم مصنوعات کی قیمتوں میں بڑا اضافہ کرتے ہوئے پیٹرول اور ڈیزل دونوں کی قیمتوں میں 26 روپے 77 پیسے فی لیٹر اضافہ کردیا ہے۔

پیٹرولیم ڈویژن کی جانب سے قیمتوں میں اضافے کا نوٹیفکیشن جاری کردیا گیا ہے جس کے مطابق پیٹرول کی نئی قیمت 393 روپے 35 پیسے فی لیٹر جبکہ ڈیزل کی نئی قیمت 380 روپے 19 پیسے فی لیٹر مقرر کی گئی ہے۔

نوٹیفکیشن کے مطابق نئی قیمتوں کا اطلاق آج رات 12 بجے سے ہوگا۔

وفاقی وزیر پیٹرولیم علی پرویز ملک نے کہا ہے کہ علاقائی کشیدگی کے باعث عالمی سطح پر تیل کی قیمتوں میں مسلسل اضافہ ہو رہا ہے جس کے اثرات پاکستان پر بھی پڑ رہے ہیں۔

انہوں نے کہا کہ عالمی معاہدوں اور معاشی صورتحال کے باعث حکومت کو یہ اضافی بوجھ منتقل کرنے کے اقدامات کرنے پڑے ہیں، تاہم حکومت نے عوام کو زیادہ سے زیادہ ریلیف دینے کی کوشش کی ہے۔