اسرائیل کے جنوبی لبنان پر فضائی حملے، 6 افراد شہید

اسرائیل نے جنوبی لبنان میں فضائی جارحیت جاری رکھتے ہوئے متعدد ڈرون حملے کیے ہیں، جس کے نتیجے میں لبنانی وزارتِ صحت کے مطابق 6 افراد شہید ہو گئے۔ مقامی میڈیا اور نیشنل نیوز ایجنسی کے مطابق صیہونی فوج نے جنوبی لبنان کے مختلف سرحدی علاقوں میں فضائی اور ڈرون کارروائیوں کا سلسلہ تیز کر دیا ہے۔

رپورٹس کے مطابق اسرائیلی ڈرونز نے ضلع بنت جبیل کے قصبے کفرہ کے مضافاتی علاقوں پر کئی بار میزائل داغے، جس سے پورے علاقے میں شدید خوف و ہراس پھیل گیا۔ اسی طرح جنوبی شہر صور (Tyre) کے علاقے البساتین میں بھی ایک ڈرون حملہ کیا گیا، جہاں اسرائیلی طیاروں نے مختلف اہداف کو نشانہ بنایا۔

اگرچہ بعض حملوں میں ہونے والے نقصانات کی تفصیلات تاحال جمع کی جا رہی ہیں، تاہم لبنانی حکام نے تصدیق کی ہے کہ ان تازہ کارروائیوں میں اب تک 6 افراد اپنی جانوں سے ہاتھ دھو بیٹھے ہیں۔ سرحدی علاقوں میں صورتحال پہلے ہی انتہائی کشیدہ ہے اور وقفے وقفے سے ہونے والے ان فضائی حملوں نے خطے میں ایک بڑے انسانی المیے اور کشیدگی میں اضافے کے خدشات کو جنم دیا ہے۔