امریکہ ایران مذاکرات میں پاکستان کا مثبت کردار، علاقائی استحکام کیلئے سفارتی کاوشیں نمایاں ہیں،شرکاء

امریکہ کی معروف تعلیمی درسگاہ کولمبیا یونیورسٹی میں “جیو پالیٹکس میں پاکستان کا ابھرتا ہوا کردار” کے موضوع پر ایک خصوصی سیمینار منعقد کیا گیا، جس میں پاکستانی سفیر رضوان سعید شیخ نے کلیدی خطاب کیا۔ اسکول آف انٹرنیشنل اینڈ پبلک افیئرز کے زیرِ اہتمام منعقدہ اس تقریب میں نیویارک میں پاکستان کے قونصل جنرل عامر احمد اتوزئی بھی ان کے ہمراہ موجود تھے۔

سفیرِ پاکستان نے اپنے خطاب میں پاکستان اور امریکہ کے تاریخی تعلقات کا احاطہ کرتے ہوئے دوطرفہ تعاون کی مختلف جہتوں اور بدلتی ہوئی عالمی اسٹریٹجک ترجیحات پر روشنی ڈالی۔ انہوں نے خاص طور پر امریکہ اور ایران کے درمیان مذاکرات کے حوالے سے پاکستان کے سہولت کاری کے کردار کا تذکرہ کیا اور اسے علاقائی استحکام اور سفارت کاری کے فروغ کے لیے پاکستان کے مثبت عزم کی علامت قرار دیا۔

رضوان سعید شیخ نے پاکستان کے مخصوص جغرافیائی محل و وقوع اور معاشی ترجیحات پر مبنی خارجہ پالیسی کے خدوخال واضح کیے۔ انہوں نے مستقبل کے مواقع اور درپیش چیلنجز پر تبادلہ خیال کرتے ہوئے عالمی شراکت داری کو مضبوط بنانے کی ضرورت پر زور دیا۔ سیمینار کے اختتام پر ایک انٹرایکٹو سیشن بھی ہوا، جس میں طلباء نے علاقائی سلامتی، اقتصادی سفارت کاری اور اسٹریٹجک امور پر سفیرِ پاکستان سے سوالات کیے۔