آبنائے ہرمز سے متعلق صورتحال پر غور کیلئے برطانوی فوجی منصوبہ سازوں کا اجلاس طلب

لندن: برطانوی وزارتِ دفاع نے تصدیق کی ہے کہ آئندہ ہفتے برطانوی فوج کے مرکز میں ایک اعلیٰ سطح کا عسکری اجلاس منعقد ہوگا، جس کا محور آبنائے ہرمز کی سیکیورٹی اور اسے بین الاقوامی جہاز رانی کے لیے کھلا رکھنا ہے۔ سوشل میڈیا پلیٹ فارم ‘ایکس’ پر جاری بیان میں کہا گیا ہے کہ اس اجلاس میں دفاعی ماہرین اور فوجی منصوبہ ساز ان عملی طریقوں پر غور کریں گے جن کے ذریعے اس حساس آبی گزرگاہ کو دشمن کی مداخلت سے محفوظ بنایا جا سکے۔

بیان میں ایک اور اہم انکشاف کرتے ہوئے بتایا گیا کہ گزشتہ رات برطانوی فضائی رجمنٹ کے گنرز نے ایک انتہائی خطرناک اور حساس علاقے میں پرواز کرنے والے متعدد ایرانی ڈرونز کو کامیابی سے نشانہ بنا کر مار گرایا۔ یہ کارروائی اس بات کا ثبوت ہے کہ خطے میں کشیدگی اب براہِ راست فوجی تصادم کی شکل اختیار کر چکی ہے اور برطانیہ اپنی اور اپنے اتحادیوں کی مفادات کے تحفظ کے لیے متحرک ہے۔